- 039 -
1460 (26. września) W piątek przed dniem św. Michała etc.
Porozumienie monetarne zawarte pomiędzy miastami Wrocławiem i Świdnicą w sprawie bicia nowej monety halerzowej.
— Wir ratmanne der stete Breslow und Sweidnicz bekennen und tun kund offenlichen mit disem brive allen die in sehen adir horen lezen, das wir uns mit willen und erloubunge des durchleuchtigsten fursten und herrn, herren Jorgen kunige zu Behem, unsers gnedigsten herren, disen landen in Slesien zu gemeynem nücze gedeye und fromen eyne hellermüncze zu slahen und zu münczen uff ein korn und uff gleichen gradt und uffschrot, unschedelichen unsern privilegien und briven, die wir obir die müncze haben, mitenander voreynet und vorbunden haben in sulcher nachgeschrebener ordenunge und weisze. Czum ersten so als denn in disen und andern landen vil geringe und boze münczen geen, beide an hellern und an pfeninngen, dodurch arm und reich sere vertirbet und ein gemeyner nucz abnymmet, so wellen wir eyne gemeyne landeswere munczen und slahen, nemlichen heller uff gleich und slecht gebreche, iczlich teil under seyme czeichen, also das man einen vor den andern erkennen mag, und dieselben heller sollen an dem korn zum firdehalben und zum uffschrot zu dem achten besteen; der sulden drey fierdung und nicht mehr noch weniger vor einenUngarischen gulden geen und gelden. Dorczu wir einen gemeynen munczemeister sullen haben, der uns sweren sal und sich bey dem brande vorbinden, das her das korn und uffschrot als vorgeschrieben steht unvorwandelt sal halden und ir keyner weize geringern, und das her aus eyner mark silbers nicht anders noch meher haller slahen sal, wenn in von uns ab beiden teilen eyntrechtiglich nach unserm erkentnis befolhen wirt. Und iczlich teil sal dem andern von iczlichem gosze ein scot vorsigilt senden, das man prüfen mag und sal, das das korn also zu dem firdehalben und der uffschrot zu dem achten destehe. Und wenn ein teil einen gusz gewszt und münczet, sal das ander teil auch ein gusz tun, und also fort ein teil vor und das ander dornoch ungeferlich. Und ap ymands uff diese unsere müncze beyslahen wurde, zu dem sullen wir gedencken und noch seinem leib und gut stehen noch alle unserm vormogen als zu eyme felscher. Item so sullen wir an beiden teilen kein geringe silber lossen gissen sunder alleyne durre gut silber, das to zum zeichen gebrant adir czeichens wert ist, und iczlich teil sal an dem korn und an dem gewichte recht tun ane geferde, das ein teil vor dem andern kein forteil noch nücz sal haben in keyner weize, sunder alleyne einen gemeynen nücz hirynnen zu suchen. Alle und iczliche obgeschribne puncta und artickelegloben wir enander bey unsern guten trawen ane arg und ane allerley argis yntrag gancz feste und unvorbrochlichen zu halden. Und des zu geczeugnis haben wir unsere ingsigle mit wissen an disen brieff lossen hengen.
Geschen und geben am freitage vor sante Michels tag des heiligen erczengils noch Cristi geburte vierczenhundert jar und dornoch im sechczigisten iare.